मुंबई – जमात-ए-इस्लामी हिंद, महाराष्ट्रचे अध्यक्ष मौलाना इलियास खान फलाही यांनी अकोला जिल्ह्यात महाराष्ट्र डेमोक्रॅटिक फोरम (चऊऋ) आयोजित कार्यक्रमात भारत जोडो अभियानाचे राष्ट्रीय संयोजक आणि सामाजिक कार्यकर्ते योगेंद्र यादव यांच्यावर झालेल्या अनुचित आणि निंदनीय हल्ल्याचा तीव्र शब्दांत निषेध केला आहे.
मौलाना इलियास खान फलाही यांनी माध्यमांशी बोलताना सांगितले की, योगेंद्र यादव आणि उल्का महाजन यांच्यावरचा हल्ला हा लोकशाही मूल्यांवर आणि अभिव्यक्ती स्वातंत्र्यावर गंभीर आघात आहे. हे आपल्या संविधानाचे आधारस्तंभ आहेत. ज्या सार्वजनिक मंचावर लोकांनी संविधानिक तत्त्वांवर चर्चा करण्यासाठी एकत्र यायचं होतं, तिथे अशी आक्रमक वर्तनं पाहणं अत्यंत चिंताजनक आहे. काही समाजकंटकांनी स्टेजवर घुसून माईक हिसकावणे, वक्त्यांना खाली उतरवणे आणि गाड्यांवर हल्ले करणे हे असहिष्णुतेच्या धोकादायक प्रवृत्तीचं प्रतीक आहे. ही फक्त व्यक्तींवरचीच नव्हे, तर मोकळ्या चर्चेच्या आत्म्यावरही झालेली आघात आहे, जी सशक्त लोकशाहीसाठी आवश्यक असते. खरी लोकशाही ही संवाद आणि चर्चेवर उभी राहते, धमक्या किंवा दडपशाहीवर नाही.
ते पुढे म्हणाले, हा हल्ला एकजूट आणि न्यायासाठी आवाज उठवणार्‍या लोकांच्या आवाजाला दडपण्यासाठी योजलेला प्रयत्न वाटतो. वक्फ सुधारणा, मुस्लिम धार्मिक स्थळांवर हल्ले, जातीवर आधारित आरक्षण आणि इतर वादग्रस्त मुद्द्यांवर विचारपूर्वक चर्चा करूनच तोडगा काढता येईल. आम्ही सर्व न्यायप्रेमी नागरिक आणि सामाजिक संस्थांना पक्षीय राजकारणाच्या पलिकडे जाऊन अशा प्रकारांवर स्पष्ट निषेध नोंदवण्याचं आवाहन करतो आणि महाराष्ट्रात मोकळ्या अभिव्यक्तीसाठी अनुकूल वातावरण निर्माण ठेवण्याची जबाबदारी पार पाडायला सांगतो. जमात-ए-इस्लामी हिंद प्रशासनाला विनंती करते की या घटनेची निष्पक्ष चौकशी करून दोषींवर तातडीने योग्य कारवाई करावी. दहशत आणि हिंसेला आपल्या लोकशाहीत जागा नाही. मतभेद कितीही तीव्र असले तरी त्यावर आदरयुक्त संवादातूनच तोडगा काढला पाहिजे. संविधानात दिलेल्या तत्त्वांची सुरक्षा सुनिश्चित करणे, नागरिकांना भीतीविना स्वतःचा आवाज उठवता यावा आणि एकतेचा व न्यायाचा मार्ग दृढ करणं हे आपलं सामूहिक कर्तव्य आहे.
